terça-feira, 23 de junho de 2015


 

Já está aqui o Solstício de Verám e como todo-los anos celebraremo-lo no Fuscalho. Aqui vos deixamos o cartaz ganhador do Concurso de cartazes da Sangrinha, difunde!


 

segunda-feira, 8 de junho de 2015

Ruada por Rosalía

Como já se está convertendo em tradiçom, um ano mais volve a Ruada por Rosalía à Guarda. Será a sexta 12 de junho, co-organizada polo Equipo de Normalización Lingüística da Sangriña e o Centro Social Fuscalho. Começaremos às 20:00 horas desde o Alborada, passando polo Arruaz, Teclas, Chancarrello e Fuscalho. Animamos a todo o mundo a que venha compartir os seus poemas prediletos tanto de Rosalia coma de outr@s autores/as em galego. O formato será o mesmo que em anteriores ediçons, com tribuna aberta em todos os locais para todo o mundo que queira expresar-se tanto de jeito recitado como musicado.

Coa intençom de melhorar detalhes, este ano faran-se um par de quedadas previas para ensaiar minimamente as intervençons recitadas. Toda pessoa interesada que se ponha em contacto com Marisa Guera (marisinhas@yahoo.com). Para quem nom os traia preparados da casa, também se desponhibilizara durante o percorredio umha selecçom de poemas para que poidam recitar.

Porque como reza o cartaz, as nossas letras som merecedoras de ser usadas e reivindicadas os 365 dias do ano, e nom só puntualmente en datas comemorativas, para umha vez passadas estas asistir atónitos a como esmorecem no baul da história.



Para rematar, engadimos a informaçom sobre a acesibilidade dos locais da ruada para todas aquelas pessoas com problemas de movilidade:

- Alborada: Dificultades de acesso para pessoas com movilidade reducida, sem possibilidade de acesso para pessoas em cadeira de rodas.

- Arruaz: Necessidade de meios portátiles para aceder de jeito autónomo. Nom estam garantizadas as condiçons de seguridade. As pessoas usuárias de cadeira de rodas nom tenhem possibilidade de entrar no quarto de banho. O resto de pessoas com movilidade reducida podem presentar serias dificultades. (meios proporcionados para a entrada no local polo Fuscalho, só disponhíveis para a Ruada).

- Teclas: Necesidade de meios portátiles para aceder de jeito autónomo. Nom estam garantizadas as condiçons de seguridade. As pessoas usuarias de cadeira de rodas nom tenhem possibilidade de entrar no quarto de banho. O resto de pessoas com movilidade reducida podem presentar serias dificultades. (meios proporcionados para a entrada no local polo Fuscalho, só disponhíveis para a Ruada).

- Chancarello: Nom está garantido o acesso de jeito autónomo e de ser possível nom é em condiçons de comodidade e seguridade. Para o quarto de banho nom se pode garantizar o acesso ao habitáculo.

- Fuscalho: Em geral, é possível a entrada de jeito autónomo e em condiçons de seguridade e comodidade. No quarto de banho está garantido o acesso ao habitáculo. Nom está garantido que todas as pessoas poidam fazer uso do wc e/ou lavabo.

terça-feira, 5 de maio de 2015

Documentário no Fuscalho: Tesouro de Corcoesto.

Esta sexta 8 de maio, projeçom do documentário Tesouro de Corcoesto, com a presença da sua directora, Cora Peña.

Um pouco de informaçom sobre o documentário:

"Corcoesto, ou de como a informaçom e a mobilizaçom cidadá conseguirom deter à empresa canadiana Edgewater e o programa de especulaçom mineira promovida pola Xunta.

Polo 2013 a Comarca de Bergantinhos começou a escoitar que seria o branco dum projecto de mega-minaria, umha mina a ceu aberto com tratamento de cianuro, umha das técnicas mineiras mais agressivas praticadas no mundo. Desde esse momento, dar-lhe visibilidade à problemática tornou-se na principal arma de atuaçom de plataformas como Salvemos Cabana. A cidadania atacou com manifestaçoms, ediçom de um livro de poesia, conferências e por último este documentário, o cal pretende mostrar a problemática, a polaridade da sociedade e perante todo, criar debate.

Mas nom tratemos a Bergantinhos como a única possível afectada, a faixa aurífera estende-se ate concelhos do Baixo Minho. Bergantinhos tam só seria a punta de lança."

Também podedes visitar o web do documentário: http://www.corcoesto.com/

segunda-feira, 9 de março de 2015

Apresentaçom do documentário A Volta dos Nove.

Sexta 13, apresentaçom do documentário A Volta dos Nove, arredor da repressom franquista no Val Minhor.

Outubro de 1936. Na noite do dia 15, nove homens som sacados da prisom habilitada no Frontom de Vigo e levados às aforas de Baiona. Ali seriam selvagemente assassinados. Era o final duma vingança que se iniciara dous dias antes. Mas também era o começo duma lenda: a das cruzes de "A Volta dos Nove".

Apresenta a associaçom, arquivo da memória social e produtora O Faiado da Memoria, de Vila-Garcia (http://www.blogoteca.com/ofaiadodamemoria/)

Podedes ver o trailer no seguinte enlace: http://vimeo.com/79727513

segunda-feira, 2 de março de 2015

Falando Claro, o novo projecto de Pepe Sendón, no Fuscalho.

Esta sexta 6, apresensentaçom audiovisual de Falando Claro, obra arredor da figura de Claro José Sendón Lamela. O novo projecto de Pepe Sendón.

Claro José Sendón Lamela, nacido en Louro - Muros en 1897 e finado en Nova York en 1937, deixounos en apenas corenta anos unha peripecia vital tan convulsa e turbulenta coma a época que lle tocou vivir. Sendo aínda un neno, cruza o Atlántico como parte do masivo éxodo galego de principios do século XX.

En Buenos Aires, encirrado pola súa inqueda curiosidade, inicia unha formación autodidacta que anos despois agromaría no seu traballo xornalístico e alí acada tamén a conciencia de clase que o fará, fillo do pobo, traballar arreo a prol da causa dos desposuídos, sempre desde os principios anarcosindicalistas que aprendeu e practicou nas loitas obreiras arxentinas.

Xa un mozo, nos anos 20, atopámolo participando activamente nos círculos libertarios de Filadelfia e Nova York, moi en contacto coa prensa ácrata de Barcelona e atento á evolución do crecente anarquismo galego, no que se integrará con decisión no seu retorno á terra nos anos 30, desenvolvendo un intenso labor na sección galega da CNT.

Orador de recoñecida valía, organizador incansable (sobre todo na bisbarra do Barbanza) e posuidor dunhas persoais dotes xornalísticas que o levarían a publicar en numerosas cabeceiras ácratas españolas, dirixir o semanario Solidaridad Obrera na Coruña e integrar a redacción do Diario CNT en Madrid, Claro foi unha das figuras sobranceiras do sindicalismo galego nos tempos da 2ª República.

FALANDO CLARO trata de reconstruír a vida aventureira dun personaxe único a través dos textos que nos deixou.

Por medio deles transitaremos pola Semana Tráxica arxentina, polos anos 20 neoiorquinos, polo Crack de 1929 e a posterior Grande Depresión, pola vitalidade dos primeiros días da República e o agre Bienio Negro, por insólitos episodios do anarquismo galego, polos ominosos días previos á sublevación militar e, finalmente, pola Guerra Civil española.

As palabras dun rebelde, deste afouto rebelde de Louro, libertarias e radicais, agudas e retranqueiras, dramáticas e emocionantes, serán a nosa guía para coñecer unha figura novelesca que malia parecer de outro mundo, é do noso; e para revisitar unha parte moi importante do noso pasado, que malia parecer de outra historia, tamén é a nosa.


quinta-feira, 5 de fevereiro de 2015

IV Festa de Entruido Da-lhe co Sacho.

O Entruido já está a volta da esquina, e como é tradiçom volve ao Fuscalho umha nova ediçom do Da-lhe co Sacho!

Este ano contaremos com o novo producto da cena musical guardesa, Kill me Truck, versionando as milhores bandas sonoras de filmes e séries a ritmo de blues, rock e country. Todo isto no marco de um espectáculo audiovisual que de seguro vos sorprenderá.

E junto a eles voltam polo Fuscalho os nossos surfistas de Fedorento preferidos, os Santos Morcegos, na que será a apresentaçom oficial do seu último trabalho, o EP "Corre Canceliñas Corre".

Ademais, junto com o tradicional concurso de disfraces, contaremos com karaoke ao final do concerto.


quarta-feira, 4 de fevereiro de 2015

Manifestaçom nacional polo futuro do galego.

Este domingo 8 a gente do Fuscalho estaremos nas ruas de Compostela manifestando-nos contra as políticas lingüicidas do PP, que tenhem levado a que por primeira vez na história o galego deixe de ser a língua mais falada do pais. Dentro da convocatória da plataforma Queremos Galego, manifestaremo-nos dentro do Bloco Laranja, junto com diferentes coletivo do reintegracionismo de base.


Participa no Bloco Laranja e ajuda a difundir a convocatória.
Na Galiza em Galego!

segunda-feira, 19 de janeiro de 2015

O galego internacional como escolha. Falemos de estratégias para a língua na Galiza.

Esta sexta 23, às 20:00, palestra no Fuscalho: O galego internacional como escolha. Falemos de estratégias para a língua na Galiza.

Da mam de Miguel R. Penas, presidente da AGAL (Associaçom Galega da Língua), falaremos dos porquês e da vigência da estratégia reintegracionista, em um contexto de continua perda de falantes de galego.